Iha tempu beala sira (antes okupasaun Portugues), Ira-lalaro ne'ebe agora ita konyese no hare nudar lagoa boot liu ita Timor Leste, uluk hanesan Knua ida ne'ebe ema hela (kuaze familia sanulu resin). Iha Knua ne'e Fohorai boot ida moris iha Aihun nia kuak laran. Fohorai ne'e baihira ema boot sira ba hotu toos no natar i hela deit labarik sira, nia nakfilak-an ona hanesan ema Katuas fuk mutin ida no mai halimar ho labarik sira. no bainhira sira besik Aihun ne'ebe Fohorai ne'e moris ba, labarik ida sempre lakon no labarik nain 3 mak lakon ona iha Knua ne'e. Akontesimentu ne'e sai preokupasaun husi familia hirak ne'ebe moris hamutuk iha Knua refere, maibe sira lahatene lolos motivu husi kazu ne'e. to'o sira hetan informasaun husi labarik sira kona-ba 'Katuas fuk mutin' ne'ebe sempre mai halimar ho sira iha loron hirak nia laran, sira komesa detekta ona no foti konklusaun katak fohorai ne'e mak autor ba kazu ne'e.
Sira komesa halo planu atu oho fohorai ne'e, no iha loron ida ema bot sira subar hotu i haruka labarik sira mesak mak halimar iha liur hodi lasu fohorai boot ne'e sai husi nia fatin. sira nia lasu susesu duni, no sira komesa atensaun, bainhira fohorai ne'e dok ona husi nia subar fatin, sira komesa sai no oho kedas.
Ema sira kontenti tebes tanba konsege oho fohorai ne'ebe nauk labarik sira, no halo sira moris iha tauk nia laran. Fohorai ne'e sira halo festa boot no kunvida sira nia maluk husi Knua vizinus atu partisipa hotu. sira tebe, dahur, kanta no hemu tua hamutuk durante semana ida. Festa sei kontinua teki-teki Manu aman ida kokorek ho lian fataluku nune'e "kokorikole lo atu ira apacau" ka 'Kokorek rai atu naben'. Maibe ema barak ne'ebe iha festa la rona so ferik ida ne'ebe iha Uma mak rona momos manu nia kokorek ne'e. Ferik ne'e tun husi uma no ba festa hodi fo hatene ema hotu iha ne'eba, maibe sira la fiar. la kleur manu kokorek tan dala ida, i ferik ne'e ho nia be-oan komesa ses an husi fatin ne'e. la kleur be komesa sae ona no ema barak foin hakfodak hodi halai namkari.
Iha momentu ne'e ema ne'ebe sei forti konsege halai sai, maibe ferik ho katuas sira sira husik deit iha ne'eba ho lia menon katak 'sira nia jerasaun sei adora nafatin sira nudar sira nia beala'. Tuir aiknanoin, katuas ho ferik sira ne'ebe sira husik iha ne'eba mak nakfilak-an ba lafaek ne'ebe agora nakonu iha lagoa ira-lalaro. to'o agora komunidade sira ne'ebe hela besik lagoa ne'e sei nafatin bolu lafaek ho 'Abo'.
Ira-lalaro nia matan lolos mak 'Loina' ka ema konyese ho naran 'Lata lafai' (Knua boot). to'o agora iha tempu bailoron naruk, ita sei hare ai-rin husi uma adat Lospalos iha fatin ne'e bainhira be tun liu to'o nia matan.
